ليلة عرس ...!

بليله ظلمه

دوروا كل الدرابين الزغيره

دكَدكوا ...

وهدّدوا ...

ومالكَوا غير الشعارات الجبيره

معلكَه علْ الحيطان

بخيوط الحصيره

رَسْمة دموع الفِلح

جنها وطن

مدري ظفيره ،

ولنها غفله

او وسوس الخاين ضميره :

هناك بالتنور

تلكَون البيانات الخطيره !

وجرجروا زلمتنه النجر

للمشنقه !

فرحان جن ليلة عرس

يهلهل ... يهلهل ...  

وهلهلن نسوان الطرف  

وشرِّعن بيبان الفقيره

وصاحت الديره            

ياشهم ...!

دير بالك عثرة جدامك

خطيره !

ومن تسيح

من الكصه كطره

لا تظل عدنه كرامه

وتدري هاي اكبر شهيره !

ورد يهلهل ...

وشالته زنود المشانق

للسمه

نجمة كحيل مكحّله

تنثر فرح

على جفون الزغار

النايمه بليـّه عشه !

تتنطر اميره !

* أميرة ، رمز للفرح ، الثورة

* القصيدة اهداء الى شهداء العمل السري.

عبد الرضا المادح

  كتب بتأريخ :  السبت 01-08-2020     عدد القراء :  152       عدد التعليقات : 0